گوہاٹی،18؍فروری (ایس او نیوز؍ایجنسی) مرکزی وزیر زراعت نریندر سنگھ تومر نے جمعرات کے روز کہا کہ مرکز اب بھی ان کاشتکاروں سے بات چیت کا خواہشمند ہے جو تینوں زرعی قوانین کے خلاف احتجاج کر رہے ہیں۔ یہاں پریس کانفرنس سے خطاب کرتے ہوئے انہوں نے کہا کہ وزیر اعظم نریندر مودی نے پارلیمنٹ میں کہا تھا کہ حکومت تینوں زرعی قوانین پر  بات کرنے کے لئے تیار ہے۔

تومر نے کہا ، ہم احتجاج کرنے والے کسانوں سے مستقل رابطے میں ہیں۔ حکومت ہند قوانین کے تحت ہر دفعات  پر  بات کرنے کے لئے تیار ہے۔ یہ پوچھے جانے پر کہ کیا مرکز دہلی کی سرحد پر  تقریباً تین ماہ ڈٹے احتجاج کرنے والے کسانوں کے ساتھ ابھی بھی  بات چیت کا خواہشمند ہے ، وزیر نے جواب دیا کہ  ہاں۔ تاہم انہوں نے اس بارے میں کوئی تبصرہ نہیں کیا  کہ  دونوں فریقوں کے مابین بات چیت دوبارہ شروع ہونے کا امکان کب ہے ۔

 تومر نے میڈیا کو یہ بھی بتایا کہ اگلے مالی سال کے بجٹ میں ، ملک میں کاشتکاروں کی فلاح و بہبود کے لئے متعدد اسکیمیں تجویز کی گئی ہیں۔ اس سال مارچ یا اپریل میں آسام میں انتخابات ہونے والے ہیں اور حزب اختلاف کی جماعتیں کسانوں کی تحریک کو انتخابی مسئلہ بنانے کی تیاری کر رہی ہیں ، لہذا مرکزی وزیر زراعت کا یہ دورہ کسانوں کو اس انتخابی  ریاست  میں نئے زرعی قوانین کے فوائد بتانے کی کوشش کے طور پر دیکھا جارہا ہے ۔